Neste blog non somos de lanzar campañas, pero hoxe queríavos pedir o voso gran de area para unha cousa que me parece de sentido común. O caso é que entrei na web desa tenda de electrodomésticos e de informática de orixe alemá, Media Markt, esa que ten como lema “Yo no soy tonto”. Pois veredes, a min si que se me quedou cara de parvo cando vin que teñen a web en español, en catalán e en éuscaro. Iso si, en galego non.

O caso é que a min me estraña e me sinto discrimanado. Vale que non teñan obriga de facelo, pero por que si en español e nas outras dúas linguas representativas, o catalán e o eúscaro, e non en galego? Acaso é que non temos tantos cartos os galegos e por iso non interesa poñer a web na nosa lingua? É que non existimos?

Sinceramente, pido, cando menos, o mesmo trato no galego ca o resto de linguas que se falan no estado. Sei que seguramente non o fixeron por mal e que dan a oportunidade aos vascos e aos cataláns de se poderen informar na súa lingua dos produtos que esta cadea ofrece. Pero precisamente por iso, porque me dá envexa e creo que eu tamén podería, gustaríame que estivese en galego.

Se pensades o mesmo ca min, por favor, escribide un correo a mediamarkt@mediamarkt.es indicándolles que vos gustaría que a súa web estivese en galego, como tamén o está noutras linguas. A ver se conseguimos facer algo.

Graciñas!

Tags: galego, lingua, Media Markt, web

Esta Entrada foi engadida no 7 Enero 2010 at 21:40 e pertence a Era boa. Pode seguir as respostas a través do seguinte feed RSS 2.0. Respostas están pechadas, pero pode trackback do teu sito Web.