Esta fin de semana empezou oficialmente a campaña electoral. E para non saturarnos con tanto acto político-festivo ímonos a outras festas máis lúdicas, porque o entroido está xa aquí. O tema do ano, como non, é a crise, así que en Pontevedra decidiron mofarse da situación económica e decidiron tirar os billetes polas rúas.

E é que o programa de festas do Entroido pontevedrés ten forma de billete de dollar: “Os billetes circularán pola rúa para que sexan cambiados polo desfrute e a troula”, di a concelleira de Festas, Anxos Riveiro.

O ilustrador Kiko da Silva encargoouse do deseño do cartel, que en forma de billete de dollar leva impreso a cara de Ravachol a modo de “presidente”, dándolle á vez nome á moeda que máis vai circular os próximos días pola cidade: o “ravacholar”.

Un pontevedrés acaba de gañar unha comida con Mariano Rajoy tras converterse no vencedor do concurso “Come con Rajoy”. O seu nome é Andión López, e seguro que é a envexa de moitos simpatizantes do Partido Popular, pero el foi escollido. O seu vídeo A voz da rúa valeulle o premio, unha cita para comer co presidente dos populares na sede madrileña do partido.

E vídeo foi gravado o pasado mes de outubro no mercado de abastos de Pontevedra, alí micrófono en man dedicouse a preguntar aos cidadáns a súa visión da crise, logo de ofrecer o seu punto de vista. O resultado é este. Ben, o certo é que suprimiron o vídeo en Youtube por infracción nos termos de uso, así que vos deixamos unha imaxe do gañador publicada por La Opinión de A Coruña.

En Galicia sempre fomos de bo comer. Pero resulta que agora andamos en crise e os cartos están contados. Pero sendo como son estas festas especiais, dende aquí propoñémosvos un menú con marisco (como non podía ser doutro xeito), pero económico.

De primeiro bogavante:

De segundo nécoras:

E xa, para rematar, vieiras:

Ala, bo proveito e boas festas a todos

Non están para festa no Concello de Santiago. Por non ter, non teñen nin cea de Nadal, como recolle esta mañá La Voz de Galicia. A crise está a amolar a moitos pero sen dúbida é unha boa escusa para outros, mais aínda en temas tan delicados como as ceas de empresa.

Para mostra as declaracións dun membro do goberno local que recolle o diario: “O ambiente non está para nada diso. Con ese estilo de trifulca permanente e de crispación a verdade é que non hai ganas de ceas, porque ademáis aquí xoga moito a humanidade”.

Máis ocurrente foi a proposta da oposición, en boca do seu líder Conde Roa: “Propoño que se faga un rallie París - Dakar con cañas no que participe toda a corporación. Pero pagando a escote”.

Sorprendido quedei estes días cando atopei un valo publicitario no que se podía ler: “Grazas por nada e adeus ao bipartito”.

Agora, acabo de ver outro que reza: “Bipartito. Crise. Paro. Despilfarro”.

O certo é que non ten o logotipo de quen o paga, pero non hai que ser moi listos para saber que detrás está o PPdeG. Comeza así, de xeito visible nas rúas, a precampaña. E aínda que no Parlamento e nos medios de comunicación todos os días para a oposición sexa unha oportunidade para tirar abaixo ao goberno, agora é cando teñen que comezar a espabilar.

Por certo, que iso de “Grazas por nada e adeus ao bipartito” saiu de Feijoo. Buscando por aí, atopei que o dixo nunha comparecencia na cámara galega, onde intentou desacreditar a labor do bipartito. No xornal mesmo comparan a frase con aquela famosa de Aznar de “Váyase señor González”.

Rematando xa por hoxe, digo que iso de criticar está moi ben, sobre todo cando está próximo o día para ir votar. Pero eu boto de menos un pouco máis de ideas, de propostas, de unidade e de ganas por facer de Galicia un sitio mellor. E dígoo tanto polo PPdeG como por outros que están ou estiveron na oposición. A min esta clase de campañas lémbrame demasiado á que fixo o PP a nivel nacional contra o PSOE dicindo que eran amigos da ETA, que España se rompía e que a economía española ía caer en picado. Ao final seguen na opisición…

Con este da crise, igual para a próxima temos que pasar de longo dos postos de polvo e de churrasco das feiras. Pero se botamos moito de menos iso de ter un cefalópodo enriba do prato, recoméndovos esta receita que é moi barata ;). Iso si, tan boa non está

Historicamente, Galicia sempre foi unha rexión mal estruturada no económico e no social. A nosa estrutura económica, moi centrada na man de obra non remunerada, na emigración e na agricultura de subsistencia lastrounos durante décadas. E aínda continúa a cousa.

Por iso sufrimos tanto nas crises: porque estamos mal e pasamos a estar aínda peor. Retrocedemos en canto conseguimos unha migalla.

É o caso do que leo hoxe en Vieiros, onde se publica que “se triplican as empresas galegas en creba e suspensión de pagos no segundo trimestre“. E a cousa ten pinta de ir a peor.

Co que nos custa crear empresas e emprego e agora pasa isto. Xa estou vendo que dentro de nada a taxa de desemprego chega ao 14%. Tempo ao tempo porque aínda quedan moitos meses duros. De momento creo que da crise só se ve a sombra.

En canto ás empresas afectadas, por sectores, o 28,7% das concursadas tiñan como actividade principal a construción, o 22,8 % a industria ou enerxía e o 17,5% o comercio.