Quen era Franco? Un ditador, amigo de Hitler, que tiña bigote e dáballe patadas aos gatos e aos cans. Prohibiu o galego e metíache no cárcere por cantar o himno de Galicia.

Claro e conciso, así é como ven a Francisco Franco os máis novos, que non por novos son parvos. Se non, mira o que din del no programa da TVG “O país dos ananos”:

Pois si amigos. Que vos parecería se vos dixera que teño uns restos da Muralla de Lugo na miña casa, parte da Torre de Hércules no xardín e unhas estatuas do Pórtico da Gloria no salón? Pois aínda que non é certo nada disto, quen si pode presumir de ter un cacho da catedral de Santiago na súa “chabola” é a familia Franco.

E o mellor de todo é que estarán á vista de todo o mundo ata o 7 de setembro no Quiosco Afonso da Coruña. E como é posible todo isto? Pois empezando porque un nobre compostelano vendeu en 1947 dúas esculturas do Pórtico da Gloria ao Concello de Santiago por 60.000 pesetas. En 1960 pasaron a mans de Franco como regalo. O ditador instalounas primeiro como parte da decoración do pazo de Meirás e máis tarde levounas á vivenda que a familia ten na Casa Cornide, segundo recolle La Opinión de A Coruña.

O que me pregunto eu é: como é posible que Grecia reclame aos museos ingleses cachos do Partenón de Atenas e nós teñamos parte tan importante do noso patrimonio cultura, como estas pezas que datan de 1188 e de 1211 esculpidas polo mestre Mateo, na casa dun particular? Espero que Patrimonio tome nota, porque por esa regra de tres, espero que algún día a min me regalen cruceiros que hai pola miña parroquia. E que non me chisten!

Para moitos é unha provocación. E para moitos é arte. E tendo en conta que o arte tamén é provocación, nós estamos de acordo co artista da peculiar fonte, o madrileño Fernando Sánchez Castillo, que decidiu levar ás rúas de Caldas de Reis unha peculiar fonte, xa que a auga brota dos beizos de Franco. Atreveríaste a beber?

Os do BNG xa pediron a súa inmediata retirada. Home, que quede aí para sempre non, pero se temos en conta que se trata dunha escultura que vai estar un tempo e que pretende xogar coa idea dos heroes nefastos, neste caso Franco, pois como que tampouco hai que darlle máis importancia.

Pois o dito, que todo o mundo rexeita o período franquista, pero á hora da verdade os que se mollan son ben poucos. Se a finais de marzo o Parlamento de Galicia acordaba instar a Xunta a que eliminase de todos os edificios públicos dependentes da súa administración a simboloxía franquista (co voto en contra do PP, iso si), agora chega aos nosos oídos a historia do alcalde de Beade.

A min plin, debeu Senén Pousa, o alcalde da localidade ourensá de Beade. Di que non vai retirar a simboloxía franquista do concello porque non sabe nada. Aquí debe ser que ninguén ve a televisión, le o xornal ou mira para o BOE (agás cando hai subvencións, claro está).

E que os malpensados non se lembren deas misas que ata hai ben pouco pedía todos os 20 de novembro á memoria de Franco. Que va, todo son casualidades. Debía de ser que non sabía en que investir os cartos e cadrou que vos era 20-N. Total, xa postos, que máis dá pagar ese ano que sete ou oito.