De seguro que xa líchedes esta semana que presentaron a Xubi como proposta para ser a mascota do Xacobeo. Eu creo que a estas alturas do Ano Santo é un pouco tarde para andar con estas historias. De todos os xeitos, a min non me convence. Recórdame non a unha cabaza, senón a unha bomba do Mario Bros. E tamén hai quen di que semella unha pera cun gancho.

 Cargando ...

O que pasan e fan trampa, veñen na súa nave espacial e aparcan xusto enriba da Catedral de Santiago de Compostela, polo que así ou moito me equivoco ou non lles van dar a compostelana.

“o Xacobeo corre o risco de ser un fiasco e o responsábel diso é Feijóo por manter un conselleiro friki no cargo”, así de duras son as palabras do portavoz nacional do BNG, Guillerme Vázquez, sobre a polémica situación que nos últimos días xira en torno á Consellería de Cultura da Xunta.

Deixando a un lado a xestión do Xacobeo, resultan totalmente desafortunadas as declaracións do Conselleiro de Cultura, Roberto Varela, durante un almorzo informativo, recollidas polos medios: “Creo que la cultura gallega está ensimismada y a veces también acomplejada”. Aínda que logo tratou de suavizar estas palabras: “De lo que yo hablé es de la promoción de la cultura gallega en el exterior sin complejos, sin miedos, como hacen otras comunidades autónomas como Cataluña o Andalucía”.

É a segunda vez que o Conselleiro comete un erro deste tipo, pouco despois da súa elección no cargo dicía: “La cultura gallega está muy bien, pero limita un poco”.

As peticións de dimisión non se fixeron esperar e veñen precisamente do sector cultural, os once premios nacionais de literatura veñen de solicitar o seu cese. Idea que comparte o BNG, que ve perigar o potencial económico e social do Xacobeo.

Nin sequera un mes leva o Ano Santo en marcha e así está a situación. Esperemos que a música calme os ánimos.

A nova aplicación de Google para ver en detalle as rúas das cidades de todo o mundo incorporou xa novos destinos. Dede esta mesma semana xa se pode acceder ás rúas de Vigo, que se suma ás cidades de Santiago, A Coruña e Lugo.

Pero os de Google van máis alá, e súmanse á celebración do Ano Santo 2010. O Google Street View estreará antes de que finalice o ano o itinerario que percorre o Camiño de Santiago, dende Roncesvalles a Fisterra.

Deste modo, poderemos ver dende todos os ángulos as rutas, os albergues, os miradoiros, etc. que se estenden ao longo do traxecto. Durante tres meses o equipo do xigante Google paseou polo Camiño tomando miles de fotografías, que agora procesa para chegar a tempo á cita xacobea e ofrecer así a oportunidade de ver as imaxes en 360º.

O Xacobeo sobe ás novas tecnoloxías, e é que non é a única novidade para este ano. Ultímanse xa os preparativos da nova canle de YouTube, que podería ofrecer a partir da semana que vén información sobre rutas, gastronomía, consellos, etc.

A “axencia de viaxes” do Vaticano, a Obra Romana de Peregrinacións (OPR), continúa no seu empeño de tender pontes de unión entre os principais lugares de peregrinación católica do mundo.

Logo de conectar Roma con Xerusalén, Lourdes ou Fátima, agora tócalle a quenda a Santiago de Compostela. Desde onte é posible voar a Santiago usando estes avións da compañía Mistral Air, fretada por OPR para este voo que se establecerá con carácter regular a partir da próxima primavera, coincidindo co ano Xacobeo.

Pero non se trata de “ambicións turísticas da Igrexa católica”, como indicou á axencia EFE o administrador delegado de OPR, Cesar Atuire, que visitou Santiago precisamente para inaugurar unha oficina desta axencia de viaxes. “Non hai que ser católico para viaxar connosco, hai que ser un serhumano de boa vontade”.

Quen puxo en dúbida as intencións do Vaticano foi a omnipresente Ryanair, que nun comunicado asegura: “Ryanair xa fai milagres que nin o xefe do Papa pode rivalizar, ofrecéndolle viaxes aos peregrinos a Santiago de Compostela polo divino prezo de 10 euros”.

O conselleiro de Cultura, Roberto Varela, non pensa na crise á hora de deseñar o programa de concertos para festexar o Ano Santo 2010. Nunha entrevista recente a Europa Press asegurou que “la austeridad no se riñe con la calidad”.

Por iso, a Consellería xa pensa nos artistas que aspiran a contratar o vindeiro ano, entre os que se atopan U2, Coldplay o Radiohead.

Á espera de que se empecen a confirmar os primeiros nomes, queremos lembrar as declaracións de Xesús Pérez Varela, conselleiro de Cultura durante o pasado Ano Santo 2004, respecto aos posibles grupos musicais que asisitirían aos festexos.

O Arcebispado de Santiago quere dedicar a Praza da Quintana para usos puramente relixiosos durante o próximo Ano Santo 2010. Así que no canto de concertos e festivais de música terían que celebrarse exclusivamente misas e outros actos relixiosos.

“Escadalizado” mostrouse o deán da Catedral de Santiago, José María Díaz Fernández, ante a celebración de eventos de lecer nas inmediacións da Porta Santa: “Ata retretes portátiles se colocan pegados aos muros”.

A Quintana, espazo elixido habitualmente para os concertos do Xacobeo, debería servir, segundo o Arcebispado, para evitar as masificacións na catedral.

As críticas da Igrexa van tamén dirixidas contra o BNG, a quen pide que conmemore o Día da Patria Galega noutro lugar que non sexa a Praza da Quintana. Gillerme Vázquez, portavoz nacional do Bloque Nacionalista Galego, asegura que este ano “con mais forza se cabe” reuniranse alí porque “é un espazo público que pertence a todos e a todas, que pertence ao pobo, e que non pode ser privatizado por nengunha confesión relixiosa”.

Un clásico onde os haxa. No seu momento foi moi comentado, pero con esta montaxe mellora a cousa. Isto si que é a Galicia Profunda. Os políticos que nos tocou sufrir. Corría o ano 2004 e naquel tempo era Conselleiro de Cultura o (in)competente do Xesús Pérez Varela. Velaquí como fala dos concertos para o Xacobeo 2004. Esperemos que mellorara o seu inglés